Владиниот портпарол Александар Ѓорѓиев соопшти дека Власта ќе преземе нови мерки за развој на бањскиот и спа-туризмот, па затоа ќе донесе нов закон со цел да се искористат капацитетите.
„Со сите овие мерки Владата ќе даде значителна поддршка за развој на бањскиот туризам, формирање спа-центри и можности за локален економски развој, како и подобрување на услугата за бањско лекување, нови облици на туристичка рекреација и вработувања во капацитетите“, рече портпаролот.
Ѓорѓиев на денешната прес-конференција истакна дека ќе се продаваат градежните парцели близу до постоечките бањи, за да се изградат нови објекти и дека во развојот на бањскиот туризам ќе бидат вкучени и странски инвеститори.
Законот кој треба да се донесе до крајот на декември, предвидува три нови локации да добијат концесионери за искористување на водите во Проевце – Куманово, Кежовица – Штип и Стрновец, Кумановско.