Едни на протест против, но некои и со став за отворање на рудникот Иловица-Штука. Тие што останаа дома и не го поддржаа протестот, којшто се одржа во Струмица, бараат да се отвори овој капацитет за, како што велат, селата целосно да не се испразнат и на тој начин да и се спротивстават на „белата чума“.
-Ние сме „за“ рудникот, бидејќи институции кажуваат дека неговото работење не е штетно по здравјето. Со отворањето на рудникот ќе се вработи овој народ, зашто од него можеме да имаме само ќар, а зијан не. Ќарот ќе е вработувањето, бидејќи ќе се вработат многу луѓе, многу млади. Ќе се вработат граѓани од општините Ново Село и Босилово и рудникот е предуслов за опстанок на овие две општини, смета Митко Иванов од село Штука.
-Сите наши села се иселуваат и бараат спас во Словенија. Ова е една убава можност да се задржи народот тука, да си најде вработување и да остане да живее тука. Кој нешто им понудил на граѓаните за да се задржат тука? Тука во Иловица никој не смета дека со садење и берење тутун може да живее. Сточарите што мислат дека нема каде се напасува стоката-нема стока, има само еден што има овци и еден што има кози. Не држи вода нивниот муабет дека ќе нема стока, вели жител на Иловица, пренесува Југоинфо.
Ги прашува активистите за заштита на животната средина зошто не реагираат на безмилосното уништување на шумата, од каде, според него, сто кубици огревно дрво се сече секој ден.
-Ниту еден од нив не е дојден да види зашто се пустоши Огражден. Ловците кои сакаат планината да им биде чиста ловат се живо и диво-и срни и млади диви свињи, додава тој.
Никола Стаменов од Штука, поранешен претседател на Федерацијата на фармери на Македонија, од самиот почеток на проектот е за отворање на рудникот. Смета дека аргументите за и против отворање на рудникот треба да се разменуваат на маса преку дијалог со помош на експерти од повеќе области.
-Ние кои сме за отворање на рудникот, а сме многу, сметаме дека покрај можностите за вработување се отвораат и големи можности за економски бенефит. На државата, во тој економски колапс што сега се случува, и е потребен свеж капитал за да ја заздрави економијата, бидејќи како што одат работите нашата економија оди силно низ удолница. Оваа инвестиција е примамлива и ќе донесе пораст на бруто домашниот производ, ќе донесе нова инфраструктура во населените места, ќе имаат бенефит и општините и регионот и државата. Токму заради јас и многу такви како мене сме за отворање на рудникот, бидејќи од неперспективност моите две деца заминаа во странство, изјави Стаменов.
Смета дека постарите кои останале тука се клучот на вратата, бидејќи по нивното природно заминување ќе нема кој да ги отвори вратите, а децата се низ белиот свет.
Апелира Владата и надлежните институции да ги слушнат и тие што за отворање на рудникот и да седнат на заедничка маса за да се најде решение и за таа цел да се формира независно тело кое ќе го контролира ископот и преработката на рудата и дали тоа се врши според пропишаните стандарди.
Огњан Лазаров смета дека само отворањето на рудникот може да ги покрене работите кон подобро.
-Рударството никаде во светот не е забрането со закон и затоа нашето барање е многу легитимно бидејќи рударството и високо доходовна гранка. Доволно е да се присетиме што значеше рударството во поранешната СФРЈ и кој пиедестал беше и затоа Југославија беше голема сила бидејќи имаше силно рударство. Заради сето тоа е формиран Рударско геолошкиот факултет во Штип, кој треба да едуцира кадри од оваа област, смета овој жител.
И тој како и другите смета дека најголем проблем во струмичкиот регион е „белата чума“ и затоа ако не се направи нешто радикално на тој план за повеќе од една деценија струмичкиот крај може да биде Мариово.
Според него, со отврањето на рудникот Општина Босилово од надоместоците за концесија во висина од околу 4 милиони евра што ќе ги добива од рудникот може само за една година да почне да го решава проблемот со канализацијата, но и други нерешени инфраструктурни проблеми.