Нема да има промени во однос на мерката „Мој ДДВ“, а сè останува како што било и досега, изјави министерката за финансии Гордана Димитриеска-Кочоска.
Нејзината изјава следува откако директорката на Управата за јавни приходи (УЈП), Елена Петрова, вчера изјави дека мерката, откако е воведена, не го дала очекуваниот ефект.
Министерката посочи дека не ја слушнала изјавата на директорката на УЈП, но нагласи дека во Министерството за финансии досега не е пристигнат никаков извештај или информација поврзана со „Мој ДДВ“.
„Ниту сме разговарале на таа тема, ниту пак постои иницијатива за менување на законот или за отворање дискусија околу ’Мој ДДВ’. Затоа не можам да кажам дека ќе има какви било промени, туку напротив – сè останува како што беше и досега“, изјави Димитриеска-Кочоска.