Суровата нафта поскапе над 84 долари за барел, имајќи предвид дека заострувањето на санкциите против Иран претставува закана за испораката на резервите на нафта во период на солидна побарувачка и покрај должничката криза во Европа.
Цената на американската лесна нафта за терминална испорака во август на Њујоршката стокова берза се зголеми за 66 центи на 84,41 долар за барел.
Европскиот брент на Меѓународната берза за нафта во Лондон поскапе за 87 центи, на 98,21 долар за барел.
Нафтата минатата недела потона на 77 од 106 долари, колку што чинеше пред два месеци, поради очекувањата дека успорувањето на стопанскиот раст во САД, Европа и Кина ќе доведе до пад на потрошувачката на тој енергенс.
Некои аналитичари меѓутоа сметаат дека инвеститорите се премногу песимистички настроени во однос на глобалната економија, како и дека надвор од Европа побарувачката на црното злато за сега е стабилна.
– Иако падот на цената на нафтата од мај и јуни беше поттикнат со стравувањата во врска со светската побарувачка на нафта, се уште не сме виделе колапс на побарувачката, се наведува во извештајот на банката „Голдман сакс“.