Денешната средба на Еврогрупата е многу важна, затоа што треба да одлучиме дали ќе продолжат преговорите за нов пакет за поддршка за Грција, изјави европскиот комесар за економски прашања, Пјер Московиси по пристигнувањето на состанокот на Еврогрупата во Брисел.
– Ќе испитаме дали тоа може да се направи, рече Московиси, додавајќи дека Еврогрупата очекува од грчката страна да претстави комплетни, специфични и веродостојни предлози за да може да почне нова програма.
– „Грекзит“ би бил ужасен неуспех, истакна францускиот комесар и додаде дека грчките власти треба да објаснат како тие сакаат да се дејствува за да се избегне најлошото сценарио, кое Комисијата не го сака.
Тој, исто така, изјави дека „постојат повеќе од една причина за договор“ и ги повика сите страни да ги остават настрана политичките игри затоа што тоа е во корист на Грција и на еврозоната.
Според Московиси, можни се технички решенија, но топката е на грчка страна и Грција треба да каже што сака.
– Згора на се, предлозите на новиот грчки министер за финансии Цакалатос мора да бидат конкретни и ефикасни, рече Московиси.