Во јуни годинава Македонија ја посетиле 102.327 туристи кои оствариле 243.175 ноќевања што е за 20,7 отсто повеќе туристи во споредба со истиот месец лани и за 23,4 отсто повеќе ноќевања.
Според податоците на Државниот завод за статистика, бројот на домашните туристи во јуни 2018 година, во однос на јуни 2017 година, е зголемен за 15,9 отсто, а бројот на странските туристи пораснал за 22,4 отсто. Бројот, пак, на ноќевањата на домашните туристи пораснал за 11,4 отсто, а на странските за 29,5 отсто.
Во првите шест месеци од годинава бројот на туристите е зголемен за 16,4 отсто во споредба со истиот период од минатата година при што кај домашните туристи има зголемување за 9,3 отсто, а кај странските за 19,8 отсто. Во истиот период бројот на ноќевањата е зголемен за 16 отсто и тоа кај домашните туристи зголемувањето е за 6,6 отсто, а кај странските за 21,9 отсто.