„Либералната Партија оценува дека одложувањето на либерализацијата на цената на струјата е последен во низата трикови со кои Владата на ВМРО-ДПМНЕ се труди да одржи контролата врз економијата и да создава привид на политичко милосрдие кон граѓаните.
Бидејќи со одлагањето на либерализацијата цената на струјата за производството ќе остане висока, Владата продолжува да го поскапува македонското производство и да ја намалува конкурентноста на македонските компании.
Со тоа, Владата на ВМРО-ДПМНЕ го спречува развојот на домашното производство и последично, го дестимулира вработувањето во реалниот сектор.
За Либералната Партија, животниот стандард на граѓаните не се качува со социјална помош и државен интервенционизам, туку со мерки што стимулираат раст и вработувања.
Со промената на условите на пазарот, во услови кога компаниите веќе склучуваат договори за поефтина струја,Владата на ВМРО-ДПМНЕ прави директен упад во стопанството и одржува монопол на ЕВН, но и на моменталните фирми што вршат промет со струја, кои низ матните зделки на некого од власта му носат големи пари.
Одложувањето на либерализацијата на цената на струјата е спротивно и на одредбите од Атинскиот меморандумсо чие потпишување државата ја презема таквата обврска.
Со сето ова во вид, одлагањето на либерализацијата на цената на струјата од Владата на ВМРО-ДПМНЕ го кочи економскиот развој и експлицитно го поништува владеењето на правото и правната сигурност на фирмите“, се вели во соопштението на Либералната Партија.