Грција е како крава која се лизга на мраз и која мора да биде извлечена на цврста подлога, изјави денеска претседатеот на Европската комисија, Жан Клод Јункер, како метафора за тешките денови во кои кредиторите се обидуваа да и помогнат на Атина да избегне нанкрот и катастрофа.
Минатата недела 60 делегации се собраа во Брисел на самитот на Европа и Латинска Америка, но фокусот беше насочен на премиерот на Грција Алексис Ципрас кој дискретно побара уште еден состанок со најмоќниот европски лидер, канцеларката Ангела Меркел.
Ципрас чии најнови предлози за реформи беа отфрлени од европските лидери, успеа да се сретне со Меркел и со претседателот на Франција, Франсоа Оланд, но не прозилезе решение за грчкиот проблем, иако германската канцеларка порача дека „каде што има волја, има и начин“.
– Ќе продолжиме да ја туркаме Грција од мразот, рече Јункер, додека комесарот за економски работи Пјер Московиси изјави дека иако е љубител на грчката трагедија, сега е време за среќен крај.
Официјален Брисел, вината за неуспехот од преговорите ја префрлаат на Атина, со образложение дека од таму нема никакво ново решение за да се обезбедат 1,6 милијарди евра за исплата на ММФ до крајот на месецов.
Истовремено од Атина одговорија дека грчката влада никогаш нема да ги прифати барањата на кредиторите кои се однесуваат на намалување на пензиите и воведување дополнителни давачки за основните потреби, како што е струјата.
Грција истакнува дека е подготвена да разговара и натаму, додека од ЕУ и ММФ порачаа дека немаат дозвола за натамошни преговори, со што продолжува грчката драма, пренесува Франс Прес.