Помалку од 60.000 луѓе, само 0,001 процент од светската популација, контролираат три пати повеќе богатство од најсиромашната половина од човештвото, открива нов извештај за глобалната нееднаквост за 2026 година.
Извештајот, подготвен од повеќе од 200 истражувачи, открива дека најбогатите 10 проценти од луѓето заработуваат повеќе од најсиромашните 90 проценти заедно, додека најсиромашната половина од светот поседува помалку од 2 проценти од вкупното богатство, објавува „Гардијан“.
Најбогатите 10 проценти од глобалната популација контролираат околу 75 проценти од светското богатство, се вели во извештајот.
Авторите на извештајот предупредуваат дека овие екстремни разлики меѓу богатите и сиромашните станале неодржливи.
„Свет во кој мало малцинство поседува огромна финансиска моќ, додека милијарди луѓе немаат основна економска сигурност, бара итна акција“, велат истражувачите.
Од 1995 година, уделот на глобалното богатство порасна од околу четири проценти на повеќе од шест проценти, додека богатството на мултимилионерите порасна речиси двојно побрзо.
Извештајот, исто така, истакнува дека нееднаквоста не е само економска, туку влијае и на образованието и животните шанси. На пример, трошоците за образование по дете во Европа и Северна Америка се повеќе од 40 пати повисоки отколку во подсахарска Африка.
Глобалниот финансиски систем, исто така, придонесува за нееднаквоста – богатите земји можат да позајмуваат и инвестираат по поповолни услови, што им дава дополнителна предност.
Еден од авторите дури предлага и глобален данок од три проценти за најбогатите милијардери, што би можело да собере околу 750 милијарди долари годишно за образование во земјите со ниски и средни приходи.
Извештајот, исто така, ја истакнува родовата нееднаквост: жените сè уште заработуваат значително помалку од мажите, а кога ќе се земе предвид неплатената работа, јазот е уште поголем. Богатите, исто така, имаат поголемо влијание врз климатската криза.
Најсиромашната половина од светот е одговорна за само три проценти од емисиите на јаглерод, додека најбогатите 10 проценти придонесуваат за околу 77 проценти од емисиите.
Авторите на извештајот повикуваат на ефикасни политики за оданочување, прераспределба на богатството и јавни инвестиции во образованието и здравството како клучни мерки за намалување на нееднаквоста.
Тие истакнуваат дека средствата постојат, но дека е потребна политичка волја за спроведување на промените.