Откако Грците кажаа „не“ на референдумот, денеска треба да видиме како ќе најдеме решение, изјави шефот на Еврогрупата, Јерун Дејселблум по пристигнувањето на состанокот на министрите за финансии на еврозоната.
Тој додаде дека пред состанокот на Еврогрупата, ќе се сретне со новиот грчки министер за финансии Еуклид Цакалотос, за да разговараат за предлозите на грчката Влада.
– Ќе одиме чекор по чекор. Ако грчкиот народ ги отфрли старите предлози, Еврогрупата очекува нови, кои може да се сметаат за веродостојни, рече Дејселблум и изрази надеж дека може да се најде решение.
Тој додаде дека еврозоната е подготвена да стори се што е потребно за да се зачува нејзината стабилност и затоа не може да има резултат кој ќе го доведе во прашање кредибилитетот на еврозоната.