Дирерторот на „Газпром“ Алексеј Милер денеска во Атина ќе се сретне со грчкиот премиер Алексис Ципрас со кого, според официјалните најави, ќе разговараат за грчко-руската соработка за енергетски прашања.
Како што јави дописникот на МИА од Атина, главна тема на разговор ќе биде новиот гасовод со кој ќе се пренесува гас од Турција преку Грција до централна Европа.
Пред состанокот со Ципрас, Милер ќе се сретне и со министерот за енергија и екологија Панајотис Лафазанис.
Инвестицијата за изградба на грчкиот дел од гасоводот „Турски поток“ се проценува на две милијарди евра, а неговата имплементација ќе ја подобри безбедноста на понудата за грчкиот пазар, ќе создаде нови работни места и ќе придонесе за подобрување на геополитички позиција на земјата, јавуваат грчките медиуми.
За време на дискусиите се очекува да се покрене и прашањето за постоечкиот договор со „Газпром“ за доставување на природен гас.