Буџетскиот дефицит на САД се зголеми во ноември во однос на претходниот месец, што е знак дека најголемата економија во светот е на пат да забележи петти последователен годишен дефицит над билион долари, соопшти Министерството за финансии во Вашингтон.
Во соопштение се вели дека дефицитот на буџетот минатиот месец се зголемил на 172 милијарди долари од октомвриските 120 милијарди. Ноемврискиот дефицит исто така е за 25 отсто повисок во однос на истиот месец минатата година.
Вашингтонската администрација буџетската 2012 година ја заврши со дефицит од 1,1 билион долари.
Претседателот Обама и Конгресот се под притисок да го ограничат дефицитот во рамки на планот за спречување на растот на даноците и буџетско штедење кои треба да стапат на сила на 1 јануари 2013 година.