Министерот за финансии, Фатмир Бесими симболично купи една граѓанска обврзница од 10.000 денари од која очекува во следните две години да заработува по 500 денари годишно од каматната стапка од 5% која ја нуди државата на граѓаните.
Ова го објави на својот ФБ профил, наведувајќи дека со оваа инвестиција придонесуваме за развојот на земјата во развојни проекти кои се финансираат од буџетот, а се во интерес на економијата и благосостојбата на граѓаните.
„Поднесов барање до банката за купување хартии од вредност – „Граѓанска обврзница“, банката ќе ме извести за резултатот од аукцијата што ќе се одржи на 13 јули 2023 година, а сопственоста на граѓанските обврзници ќе се евидентира во Депозитарот за хартии од вредност на 20 јули 2023 година.
Со оваа инвестиција симболично ќе придонесам за развојот на земјата со развојни проекти кои се финансираат од буџетот на државата во интерес на економијата и благосостојбата на граѓаните.
Граѓанската обврзница е инвестиција и за идните генерации – затоа истото ќе и го подарам на Аурела, мојата 14-годишна ќерка, како нејзина прва инвестиција за подобра иднина на нејзината татковина!“, напиша министерот на ФБ.
Посочувајќи дека оваа инвестиција од 10.000 денари се очекува две години по ред да му донесе принос од 500 денари, и тоа на 20 јули 2024 година и истиот датум во 2025 година кога ќе биде вратена вложената вредност од 10.000 денари ги повика и граѓаните да бидат дел од овој важен процес во земјата, кој, како што наведува, им нуди лична благосостојба со сигурни и поволни инвестиции.
Министерот посочува дека со цел да избегне каков било конфликт на интереси, поради неговата јавна должност како министер за финансии и со овластувања за одлучување при издавање на хартии од вредност со цел финансирање на буџетот, нема да учествува со дополнителни инвестиции во граѓански обврзници додека ја извршувам оваа јавна должност.