Од денеска до среда, владина делегација предводена од Заменик претседателот на Владата задолжен за економски прашања д-р Кочо Анѓушев, а во која ќе бидат и министерот за здравство д-р Венко Филипче и советникот на претседателот на Владата д-р Ванчо Узунов, ќе учествува на Светскиот инвестициски форум, настан кој ќе се одржи во седиштето на Организацијата на Обединети Нации во Женева, Швајцарија.
Вицепремиерот Анѓушев во текот на утрешниот ден ќе учествува на панелот „Инвестициите во новата ера на глобализација“, на кој ќе зборуваат претседатели на држави и премиери од повеќе земји во светот, како и извршни директори на реномирани глобални компании. Воедно вицепремиерот ќе учествува и на работниот ручек на Совоетодавното тело за инвестиции со другите светски лидери.
Министерот за здравство Филипче, утре, во текот на попладневните часови, ќе учествува на панел „Поттикнување на инвестиции за развивање на нов антибактериски третман“, кој се организира во рамките на Форумот.