Во Охрид денеска завршува второто издание од УФО фестивалот, што се одржува во организација на Центарот за културен проток „АРТерија“ на летната сцена на Центарот за култура „Григор Прличев“.
На манифестацијата, твореа млади реномирани уметници, а сцената на просторот „Кино бавча“ беше исполнета со нивни уметнички перформанси.
Организаторите посочија дека станува збор за несекојдневен фестивал. На исто место беа цртани графити, имаше музички перформанси, оригами работилница, изложби на слики и уметнички фотографии, на накит и филиграни, читање поезија, прикажување филмови.
Младите уметници, според организаторите, даваат нов дух на новото време на летната сцена која сега почнува да функционира. Тие додаваат дека летната сцена „Кино бавча“ е приспособена да функционира со поддршка од Министерството за култура, за целосна реконструкција и осовременување најавена е поддршка од општина Охрид.