Утре вечер во Младинскиот културен центар гостува врвниот џез-состав од САД, „UCLA Charles Mingus Ensemble“ кој ќе одржи концерт кој ќе биде дел од неговата јужноисточна европска турнеја.
Под диригентство на реномираниот композитор, диригент и флејтист Џејмс Њутон, ансамблот утре ќе настапи во киното „Фросина“, со почеток во 21 часот.
Ансамблот „Чарлс Мингус“ го сочинуваат музичари кои се сметаат за едни од најталентираните млади џезери на американската сцена.
Тие работат со влијателниот Џејмс Њутн, кој е и нивна инспирација во творештвото, и ќе покажат како звучи новата генерација џез-музичари. Инаку, Њутн во Македонија за првпат гостуваше во 1990 година, кога настапи со неговиот квинтет на Скопскиот џез-фестивал.
Организатор на овие настани е американскиот џез-музичар, саксофонистот Дејв Вилсон, кој веќе десетина години престојува во Македонија и придонесува за развој на џез-сцената овде. Тој вели дека младите музичари од „Чарлс Мингус“ ќе покажат дека џезерската традиција е се уште жива, но дека има и светла иднина.
