Од вечерва во Центарот за култура АСНОМ во Гостивар започнува прикажување на циклус домашни документарни филмови. Манифестацијата „Денови на Македонскиот документарен филм“ гостиварската установа за култура ја организира во соработка со Филмскиот фонд на Македонија и ќе трае до 21 јуни.
Во овој период предвидено е да се прикажат вкупно 13 документарни филмови од различни продукции и автори создадени во периодот 2009-2012-та година.
Вечерва, ќе се проектираат два филма: „Волшебниот рид“ на Петар Џуровски и „Трагачи по звукот“ на Сузана Диневска. Наредниве денови циклусот проекции ќе се заокружи со „Крв за крв“ на Астрид Омери и „Кадаре“ на Алберт Дило.
Според најавите, филмовите третираат различни теми: од животот на жените вработени како шнајдерки, судбини на иселеници, сторија за единствениот изработувач на виолини во Македонија до приказна за шарпланинските убавини.
Проекциите ќе се изведуваат во големата сала на Центарот за култура со почеток во 20 часот.