Во Битола почна снимањето на долгометражниот игран филм „Банат“

Во Битола денеска почна снимањето на долгометражниот игран филм „Банат“, италијанско-романска-бугарска-македонска копродукција, чиј режисер е Адриано Валерио, еден од најдобрите млади режисери во Европа и добитник на наградата „Златна Палма“ за краток филм на филмскиот фестивал во Кан.

За најновиот проект на македонската продуцентска куќа „КТ филм и медиа“, продуцентот Димитар Николов истакна дека овој филмски проект, всушност е првиот во Македонија кој се реализира според новите правила на Агенцијата за филм и претставува пример за остантите продуценти од Македонија.

– Тема во филмот е ре-емиграцијата од Италија кон источните држави. Заситени од западното општество, многу млади луѓе одлучуваат да заминат на Исток, гледајќи повеќе перспективи за својот живот и прифесии. Филмот во Македонија се снима на локации во Битола, пелагониските села Рибарци и Буково, како и во преспанските села Царев Двор и Дупени, посочи продуцентот Димитар Николов.

Во филмот „Банат“ главните улоги ги толкуваат Едуардо Габриелини од Италија и Елена Радончиќ Црна Гора, а македонскиот тим го претставуваат Роберт Јанкуловски кој заедно со Џонатан Рикебург од Франција се директори на фотографија, сценограф е Викторија Динева, мејк-ап артист Марина Цигарида, Петар Трајчевски-менаџер на локации, Саша Станишиќ-асистент на режија, Бурим Муслиу-асистент костимограф и други лица.

– Во Македонија ќе се снима две недели, а потоа по две недели ќе се снима на 70 локации во Романија, Бугарија и во Италија, за што се ангажирани стотина членови, потенцира Николов на денешната прес конференција.