Во Белград синоќа беа отворени јубилејните 15-ти по ред Денови на македонската култура – „Допир на Македонија 2026“ – организирани од здружението „Македониум“ и под покровителство на Македонскиот национален совет.
Настанот беше отворен со изложбата „Еруптивни форми“ на реномираниот уметник Славе Ајтоски. За уметничкото дело и творештвото на авторот говореше скулпторот Синиша Новески, осврнувајќи се на специфичниот израз и длабочината на уметничкиот јазик на Ајтоски, како и на неговиот придонес во современата уметност.
На отворањето се обрати претседателката на здружението, Искра Пенева, која ја истакна важноста од континуирана афирмација на македонската култура и идентитет преку такви настани.
Обраќање имаше и директорот на македонскиот Културно-информативент центар во Белград, Васко Шутаров, кој ја потенцираше важноста на институционалната поддршка и културната соработка меѓу двете земји.
Манифестацијата ја отвори претседателката на Македонскиот национален совет, Зорица Митровиќ, која потенцира дека „Допир на Македонија“ не е само културен настан, туку простор на живо поврзување, препознавање и споделување на заеднички вредности.
Изложбата „Еруптивни форми“ ќе биде отворена за посетителите до 15 мај.
Во рамките на манифестацијата ќе има бројни културни содржини со кои преку уметноста, јазикот и традицијата – ќе ја доближат Македонија до публиката во Белград.