Македонскиот автор на цртани филмови Александар Џони-Шопов кој живее во Париз, ја доби втората награда на конкурсот на Dailymotion за краток анимиран филм на Меѓународниот фестивал за анимиран филм во Анеси, Франција.
– По пет години работа во повеќе продуцентски куќи, првпат се пријавив на конкурс со самостоен проект и добив награда. Темата на конкурсот, „Нозете во вода, главата во слики“ ме инспирираше да направам комична критика на светот во кој живееме и во кој доминира сликата.
– Приказната на Pictureless е следнава: еден ден, во малиот град Анси се појавува „мрачниот демон на мракот“ и им го краде на граѓаните она што им е најдрагоцено, не семејството и пријателите, туку сликите. Одеднаш граѓаните не можат веќе да играат видео игри или да гледаат телевизија, па мораат да се занимаваат со други активности-музика, спорт, сликарство…, изјави триесетгодишниот Шопов.
Pictureless (Concours Annecy 2013 + de courts) by a_dzone
Трите први награди ги додели жири составено од американскиот режисер Бил Плимптон, генералниот директор на Cartoon Network Studios (Калифорнија) Брајан А. Милер и главниот уредник на културната редакција на TV 20 Minutes, Стефан Леблан.