Мецосопранистката Елена Ангеловска и пијанистката Марија Ѓошевска вечер во Салонот 19.19 во Културно-информативниот центар ќе одржат концерт на француски мелодии. На програмата се дела од Сати, Орик, Русел и Пуланк.
Елена Ангеловска, колоратурен мецосопран, е родена во Париз, а средно музичко образование по соло пеење завршила во Скопје. Во периодот од 1989 до 1995 студира соло пеење во Париз на два конзерваториума и во музичката институција за високи студии „Екол Нормал“.
По студиите специјализира стара музика со акцент на барокната. Во периодот 1996-2007 има статус слободен уметник, а од 2007 година е вработена во МОБ. Реализира бројни рецитали и концерти со помали и поголеми оркестри изведувајќи програма од периодот на ренесансната до музиката на дваесетиот век. Во 1996 го формира квартетот „Келтикум“ кој и до денес има повеќе настапи на фестивали во Македонија.
Марија Ѓошевска е еден од најистакнатите и најактивни пијанисти во Македонија. Таа е вонреден професор на катедрата по пијано на Факултетот за музичка уметност во Скопје.