Филмот „Соба со пијано“ на македонскиот режисер Игор Иванов ќе биде прикажан на годинешното јубилејно 50-то издание на Интернационалниот филмски фестивал во Чикаго, во престижната секција “World Cinema”.
Интернационалниот филмски фестивал во Чикаго, ќе се одржи од 9-ти до 23-ти октомври. Се смета за најстариот компетитивен фестивал во Северна Америка и еден од водечките на американскиот континент препознатлив по постојаната потрага и претставување на најдобрите и оригинални филмски дела и автори.
Во меѓувреме, во рамки на регионалното претставување, „Соба со пијано“, вечерва, ќе ја има својата хрватска премиера, во официјалната конкуренција на интернационалниот фестивал Филм Форум Задар.
На проекцијата ќе присуствуваат продуцентот Томи Салковски и актерите Наташа Петровиќ, Симона Спировска, Јагода Кумриќ и Дениз Абдула.
Фестивалот во оваа секција преку изборот од околу 30 наслови, секоја година, се смета дека го прикажува најдоброто од реномирани автори и нови визионери.
Минатата година, оваа програма прикажа филмови на режисерите Lonesome Solo, Jafar Panahi, Adrian Sitaru, Jirí Menzel, Lúcia Puenzo, Mahamat-Saleh Haroun, Amat Escalante, Malgoska Szumowska, Nanouk Leopold, Kore-eda Hirokazu, Amit Kumar, Christoffer Boe, Giorgio Diritti, Agnés Jaoui и Arvin Chen.