Утре, 26 август, во Сули ан, започнува тродневниот книжевен фестивал „Друга приказна“ #7, кој во Скопје ќе претстави 40-ина гости од регионот и од земјата. Вториот и третиот фестивалски ден ќе се одвиваат во МКЦ-Скопје.
Фестивалот во 18 часот ќе го отвори белградскиот трансдисциплинарен уметник Урош Крчадинац со претставување на два свои сјајни проекти: изложбата „Бантустански мапи“ и предавањето „Дигитална поетика“.
Рачно илустрираните мапи од патописниот роман „Бантустан“ на Крчадинац претставуваат сложени таписерии од пиктограми, идеограми, различни писма, грбови, лавиринти, тајни пораки и скриени симболи. Како патописен роман и рачно илустриран атлас, интимна исповед и збирка животни приказни, „Бантусан“ е приказна за поделбите, изолацијата, контактот и замислувањето на новата картографија на човековите односи на заедничката планета.
Предавањето „Дигитална поетика“ е базирано на двете сестрински книги на Крчадинац, „Тактилна поезија“ и „Оптимизирана поезија“, воедно дигитално-книжевен уметнички проект. Тие ги опишуваат новите поетски пракси за производство на текст во време на масовен надзор, вештачка интелигенција и дигитална комодификација.
Централниот дел од вечерта, со почеток од 20:00 часот, ќе биде настанот посветен на угледната писателка Дубравка Угрешиќ, која е и лауретка на овогодишното издание на „Друга приказна“. Во видео-разговор кој ќе го води Румена Бужаровска, таа ќе зборува за своето творештво и општествен ангажман. За вонредните остварувања на Угрешиќ во експерименталната проза свои излагања ќе имаат и Гоце Смилевски (писател), Мерима Омерагиќ (книжевна теоретичарка), Ирена Јовановиќ (книжевна критичарка)…
Воедно, две нови македонски изданија на Угрешиќ ќе бидат промовирани: нејзината најнова книга „Нарилник за вештерки“ и нејзиниот, можеби најпознат роман, „Штефица Цвек во челустите на животот“. Книгите се во коиздание на Темплум, Контрапункт и МАМА Загреб.
Првата фестивалска вечер ќе биде затворена со мал концерт на Димитра во 22:30.
Под слоганот „Нова писменост“ фестивалот ќе ги истражува експерименталните образовни практики во наставата по книжевност, критичката и демократска училница, создавањето на книжевните канони…
Четириесетината учесници од регионот и од нашата земја ќе се обидат да ги лоцираат современите текови на регионалната книжевна сцена, ќе разговараат за книгите на сјајни писател(к)и и поет(ес)и, ќе презентираат интригантни интердисциплинарни проекти кои го шират полето на културата…
„Новата писменост“, во контекстот на „Друга приказна“, меѓу другото значи и борба за поинакво, „поалтернативно“ разбирање на книжевноста, кое истовремено е пошироко, посинтетичко, и кое уште идеалистички веерува во моќта на книжевноста да ги менува човекот и светот.
Влезот на сите настани е слободен.
Фестивалот „Друга приказна“#7 е поддржан од ТРАДУКИ и од Министерството за култура на Република Северна Македонија
ЦЕЛОСНА ФЕСТИВАЛСКА ПРОГРАМА
Петок (26.08.), Сули ан
18.00.-20.00. – изложба Бантустански мапи, водење низ изложбата и
предавање „Дигитална поетика“ на Урош Крчадинац
20.00. ВЕЧЕР НА ДУБРАВКА УГРЕШИЌ
– видео разговор: Дубравка Угрешиќ и Румена Бужаровска
21.00. – Промоција на книгите „Нарилник за вештерки“ и „Штефица Цвек…“
21.30. разговор за Угрешиќ: Мерима Омерагиќ, Ирена Јовановиќ, Гоце Смилевски, Никола Гелевски…
22.30. Димитра Цилевска – мал концерт
Сабота (27.08.), МКЦ
18.00.-20.00. РАЗГОВОРИ, БЛОК 1
– Сенка Мариќ со Калина Малеска
– Маша Сеничиќ со Душица Лазова
– Јана Букова со Душко Крстевски
– Данило Лучиќ и Витомирка Вита Требовац со Никола Гелевски
20.30. – Суштества страшни со фризури и машни – изложба на Ненад Тонкин.
21.00. ОВДЕ ПАЃААТ КРУПНИ ЗБОРОВИ (перформативен книжевен натпревар на „едноминутни новели“)
Учесници: Маша Сеничиќ, Данило Лучиќ, Јана Букова, Тања Аждаја, Ива Дамјановски, Милан Дамјаноски, Стефан Алиевиќ, Владо Манчевски, Ѓорѓи Крстевски, Живко Грозданоски… Водител: Владимир Лукаш
23.00. Проекција на филмот Дуга реса; разговор со режисерот Драган Протиќ
Недела (28.08.), Матка
13.00.-17.00. – Изложба на Анета Попова: You are my bowl / I am your bowl (Микро изложба во шума)
Недела (28.08.), МКЦ
15.30. – 18.00. Две работилници за деца со Барбара Прегељ, Ненад Тонкин и Доротеј Нешовски
Сетилна имагинативна лабораторија – цртање и моделирање ликови преку звук, мирис, допир, слика и збор.
Читање додека си играме? Поезијата на Ф. Гарсија Лорка како игра
18.00. РАЗГОВОРИ, БЛОК 2
– Разговор со Јана Бауер
– Барбара Прегељ со Никола Гелевски
– Хелена де Карина и Ружица Марјановиќ со Фросина Крушкаровска
– Ана Фазекаш со Ана Чушкова
20.00. дебата НОВА ПИСМЕНОСТ: Ана Фазекаш, Хелена де Карина, Ружица Марјановиќ, Барбара Прегељ, Никола Гелевски…
22.00. Проштална журка