Меѓународниот фестивал на филмски сценарија „Скрипт фест 2014“ ќе се одржи на 25. и 26. јуни во Културниот центар „Феникс“ во Скопје. Организатор е Фондацијата за културна и научна афирмација и презентација „Македонија Презент“ од Скопје.
Фестивалот годинава се одржува третпат, а ќе го отвори проф. д-р Александар Прокопиев од Институтот за македонска литература – Скопје. Ќе бидат врачени и наградите на годинашните добитници, „Скрипт феникс“ на м-р Константин Плевнеш од Универзитетот ЕСРА Скопје-Париз-Њујорк за развој на филмската култура, „Скрипт презент“ на Сунчица Уневска од „Утрински весник“ за долгогодишен придонес во филмската уметност, „Скрипт фест“ на авторот Кузман Клековски за неговиот ангажман и придонес на планот на филмот.
Специјално признание, наградата „Скрипт мост“ ќе му биде доделена на Раде Шербеџија за врвни и осведочени филмски остварувања и вредности.
За темата „Филмското сценарио денес – помеѓу желбите и реалностите“, ќе говори доц. д-р Христо Петрески. Ќе бидат прикажани повеќе краткометражни и документарни филмови, а ќе биде организирана и промоција на филмски изданија од Нишкиот културен центар и издавачките куќи „Феникс“ и „Маска“ од Скопје.