Спомен-костурницата во Велес се уредува внатрешно во изминатите два месеца, што е втора фаза од реконструкција на ова значајно спомен-обележје од Народноослободителната војна.
Со средства од Министерството за култура и со инструкции од Националниот конзерваторски центар, од почетокот на годинава беа изведени зафати на покривната конструкција за да се санира прокиснувањето во Костурницата.
– Поради високите температури, стагнираат надворешните работи за санација на покривот на Костурницата. Тие ќе продолжат наесен, изјави за МИА Марин Клифов, раководител во Народниот музеј, и додаде дека работите од втората фаза од санацијата целосно ќе бидат завршени до крајот на годинава.
Спомен-костурницата од НОВ во Велес е отворена на 9 ноември 1979 година. Во нејзината внатрешност почиваат посмртните останки на 87 борци од Велес и Велешко, меѓу кои и на поетот и револуционер Коста Солев Рацин.
Ова значајно спомен-обележје и едно од поновите симболи на Велес е изградено според архитектонското решение на Љубомир Денковиќ и Саво Суботин.
Со санацијата е заштитен од оштетување од дожд и големиот мозаик во Костурницата, кој е изработен од уметникот Петар Мазев.