Роман „Седмиот ден“ на Ивица Челиковиќ во издание на „Македоника литера“

„Македоника литера“ го објави романот „Седмиот ден“ на македонскиот писател Ивица Челиковиќ, втор негов роман во кој, како и во првиот „Зад источната линија“, пишува на иселеничка тема, за илузиите, патешествијата и лавиринтите во македонските и балканските емигрантски кругови во Европа.

– Но овојпат во една поширока рамка на идентитетски прашања. Главниот лик, Андреј Наумовски, во малите и големите бегства од себеси и секојдневието е распнат меѓу недоразбирања, конфликти и осамености. Го измачуваат постојаните балансирања на работ на бездната во замаглениот простор, во кој напорите да се зачува интегритетот во туѓиот свет се чинат залудни, и како никогаш да не постоеле…, соопшти издавачот.

Ивица Челиковиќ (1962) е поет, раскажувач и преведувач. Роден е во Скопје, каде што завршил Интер­дис­циплинарни студии по новинарство. Студирал и на Институтот за медиуми и масовни комуникации во Гетеборг, Шведска, каде што живее и работи. Член е на Друштвото на писателите на Македонија и на Сојузот на швед­ските писатели.

Автор е на стихозбирките: „Школки во рацете“ (1990), „Долги граници со небото“ (1992), „Мета­мор­фо­зи на патот“ (2002), „Возови во пајакова мрежа“ (2006), „Праг и огледало“ (2008), „Во ѕидот знак“ (2010), „Сенки на северот“ (поетски избор, 2013). Негови стихови се преведувани на англиски, швед­ски и персиски, а во 2014 година од печат излезе неговиот поетски избор „Сенки на ѕидот“ во превод на шведски јазик.

Автор е на романите „Зад источната линија“ (2004) и „Седмиот ден“ (2014).

Добитник е на повеќе награди и признанија, меѓу кои „Млада Струга“, „Златно перо“, „Иселеничка грамота“ и „Стојан Христов“.

Преведува шведска и норвешка литертура на македонски јазик. Превел триесетина дела од позна­ти шведски писатели, меѓу кои од Аугуст Стринд­берг, Селма Лагерлеф, Хари Мартинсон, Торгни Линдгрен, Гунар Екелоф, Биргита Тротциг, Артур Лундквист, Астрид Линдгрен, Ласе Содерберг, Ката­рина Фрос­тен­сон и Микаел Ниеми.

Преведува и македонската литература на швед­ски. Составувач е на антологијата „Македон­ска поези­ја“ што во негов превод на шведски беше објавена во 2005 година.