Издавачката куќа „Галикул“ од Скопје објави избрани дела во пет тома на писателот Тодор Чаловски, кои денеска беа промовирани во Друштвото на писателите на Македонија.
Чаловски (1945) е поет, литературен критичар, есеист и преведувач, кој активно твори 45 години. Негови дела се објавени во голем број антологии и во други изданија со кои е претставена македонската литература, а негови стихови се преведени на петнаесетина јазици.
Богатиот поетски и критичко-есеистички опус на Чаловски во македонската писателска асоцијација го претставија претседателот на ДПМ Веле Смилевски и професорите од Филолошкиот факултет Весна Мојсова-Чепишевска и Венко Андоновски.
– Творештвото е за мене животен предизвик, бидејќи цел живот, освен литературата ништо повеќе не ми претставувало задоволство. Круна на секој творец е објавувањето негови книги, а се разбира и ако дочека избрани дела. Тој чин е поплочен со многу несоници, трепети и неспокојства што секој творец ги има како своја судбина. Ова е и радост и своевидна обврска да продолжам до крајот на животот и да се остави бележита трага, рече Чаловски.
Во ДПМ Чаловски членува од 1969 година. Бил и претседател на Друштвото и претседател на Собранието на ДПМ. Добитник е на највисоките признанија за поезија што се доделуваат во Македонија. Основач е на Книжевната колонија во Галичник.