Во Битола е промовирана книгата „Профили“ чиј автор е писателката Весна Мундишевска-Велјановска, воедно добитничка на наградата „Книжевен круг“ за книжевна критика на конкурсот распишан од Битолскиот книжевен круг за 2020 година.
Книгата „Профили“ содржи два циклуса насловени „Согледби“ и „Вглед“. Првиот циклус содржи согледби за книги поезија, раскази, книжевни критики и студии издадени во периодот од 2018 до 2020 г., додека вториот циклус „Вглед“ содржи текстови кои се однесуваат на поетското творештво на авторката, кои истовремено се и нејзини видувања за поезијата, пишувањето и зборот.
Наградата „Книжевен круг“ на Мундишевска-Велјановска ѝ беше доделена на јубилејната 10. меѓународна манифестација „Битолски книжевни паметења“ која се одржа во НУ Универзитетска библиотека „Св. Климент Охридски“ во Битола.