Промоција на книгата „Ораторската вештина низ историјата“ од првиот новинар во Република Македонија – д-р Боро Мокров се одржа синоќа во Галеријата при МКЦ.
За книгата која е издание на „Антолог“ промотивна реч одржа д-р Ѓорѓи Спасов. Со изданието се одбележуваат сто години од раѓањето на д-р Боро Мокров.
– Издавањето на оваа книга е од големо значење бидејќи живееме во време на масовна употреба на интернетот и на компјутеризацијата, во време во кое комуникацијата на луѓето е сведена на минимум. На тој начин, ораторството е суштината на квалитетна комуникација, начин што има цел да информира, да влијае или да ги забавува слушателите. Ораторството денес, во ова бурно политичко време, излегува во прв план и е потребно во секоја област од нашиот општествен живот. Трудот претставува едно скромно помагало во целокупниот општествен живот, а особено во областа на правото, политиката, економијата, маркетингот итн. Ораторството претставува корен на дисциплините од иднината и неговата суштина ги има истите цели, како известувањето, информирањето, комуницирањето, се наведува кон делото.
„Ораторската вештина низ историјата“ (2017) е всушност реализирање желба на авторот да заокружи еден замислен циклус на трудови од неговата научна област – комуникологија на која ѝ посвети повеќе трудови за македонската читателска публика.