Во изложбениот салон на Музеј на град Кратово денес беше промовирана книгата “Кратовски мајтапи” од Мишо Доневски.
– Кратовскиот дијалект се зборува во градот Кратово и во неколку околни села во североисточна Македонија. За жал, во последно време автентичниот кратовски дијалект трпи промени, што се должи најмногу на миграцијата село – град и на интернационалните изрази, кои со употребата на современите медиуми за комуникација, стануваат составен дел на наречјата и на македонскиот литературен јазик. Токму со книгава сакам да го документирам и оставам во наследство дијалектот на мојот град, изјави Доневски.
Посочи дека целта е да сочува дел од случувањата во градот Кратово и околните места, на кратовски дијалект како еден сегмент од животот во градот на кули и мостови.
– Автентичноста е во Кратовските мајтапи. Во ова дело вметнав и мудрости и поговорки. Повеќето кратовци ќе речат: – Јас ги знам овие мајтапи! Да, точно е, повеќето ги знаат. Ама ако нешто не биде запишано, со време ќе отиде во заборав. Сите работи во книгата ги пишувам како што сум ги слушнал, во моја слободна интерпретација, додава Доневски.
Мишо Доневски е роден 1959 година во Кратово. Покрај книжевната дејност, работел на повеќе телевизиски проекти.