Промоција на книгата поезија „ДвОглед“ од Весна Мундишевска-Велјановска се одржа денеска во рамки на Културното лето Новаци 2015, во организација на Културно-иновативниот клуб Новаци, а под покровителство на таа општина.
Рецензенти на книгата се писателките Милица Д. Радевска и м-р Мирјана Стојановска, а промотор беше и Елизабета Јончиќ.
Поетската книга „ДвОглед“ не е само двојно гледање, двоен глед, туку е и оглед и соглед, еден пристап кој ги сублимира турбуленциите на секојдневните опстојби и психолошките реакции од нив во една модерна естетика на егзистенцијализмот.
Книгата се состои од дводелен пролог и два циклуси од по 22 песни во кои е разработен различниот пристап на поединецот кон животот во зависност од неговото восприемање на нештата (рецепцијата) и согледбата т.е. пристапот кон збиднувањата (перцепцијата).
Весна Мундишевска-Велјановска е член на Друштвото на писателите на Македонија. Автор е на книгите поезија: „Во сонот сон“, „Неспокојно сонце“, „Ден-денување“, „Птицоврик“, „Вонземски сводови“, „Вибрации на духот“ и „Поетски дијалог“, а нејзини песни се преведени на италијански, англиски, влашки, романски, српски, босански и бугарски јазик. Член е на редакцијата на списанието за книжевност, уметност и култура „Раст“, списанието за култура – литература, драмска уметност, филм и издаваштво „Современи дијалози“ и на две педагошки списанија.