На платото пред Младинскиот културен центар вечер од 20 часот ќе биде промовирана стихозбирката „На ракавот на градот“ – дебитантска поетска книга на Ивана Јовановска, издание на ПНВ-публикации.
Во поговорот кон стихозбирката, проф. д-р Владимир Мартиновски, меѓу другото, наведува дека „поезијата на Јовановска со својата свежина, едноставност и непосредност, со секој нов стих, со секоја нова поетска слика, со секое ново пеење нè потсетува на потребата да се зачува, да се обнови, да се втемели разнишаното достоинство на современиот човек“.
– Меѓу редовите на песните на Ивана Јовановска како дискретно да се открива една од тајните на добрата поезија – не само да ја поттикнува здравата надеж во нас, туку и да нè потсетува „да љубиме, / поинаку, / повеќе, пишува Мартиновски.
Ивана Јовановска (1998, Скопје) студира на Катедрата за општа и компаративна книжевност на Филолошкиот факултет „Блаже Конески“. Учествувала на повеќе поетски читања во Скопје, а нејзини песни се објавени во списанија и платформи за литература. Аматерски се занимава и со уметничка фотографија.
Промоцијата на книгата пред МКЦ ќе биде организирана согласно со здравствените протоколи за заштита од КОВИД-19.