Агенцијата за комуникации „Ксантика“ заедно со Клубот „Матица“, а во соработка со Регионалната платформа за активизам „Лице в лице“, денеска ќе ја промовираат новата книга „Семоќниот НЛП“ на авторите Дејвид Молдин и Пет Хаџинсон.
Книгата ќе ја претстави тренерот за личен и професионален развој Марина Анчевска, а на настанот што ќе се одржи во „Матица ексклузив“, ќе присуствуваат и дел од продавачите на уличното списание „Лице в лице“ кои веќе пет месеци поминуваат низ НЛП обуки. Тие со помош на овој метод ги подобруваат комуникациските и продажните вештини, ги дефинираат своите цели, како и чекорите за стигнување до нив.
Книгата „Семоќниот НЛП“ открива што знаат најуспешните луѓе за невро-лингвистичкото програмирање (НЛП), какви се нивните искуства од неговата примена и како тие се служат со овој метод.
НЛП или Невро-лингвистичкото програмирање претставува збир на техники што помагаат да се отстранат некорисните обрасци на однесување и да се создаде нов, позитивен и конструктивен пристап кон животот.