Министерството за култура денеска ќе ги промовира последните 20 изданија од проектот „Превод на литературни дела на добитници на Нобеловата награда за литература“, со што ќе биде заокружена едицијата од 145 наслови.
Нив ќе ги промовира министерката за култура Елизабета Канческа-Милевска, во Бизнис-салата на Скопски саем, каде што денеска завршува и 25. Саем на книгата.
Покрај едицијата „Нобеловци“, со која на читателите им се достапни на македонски јазик делата на писателите наградени од Шведската академија за книжевност, Министерството ја реализира и едицијата „Ѕвезди на светската книжевност“ која опфаќа 560 наслови од сите жанрови.
Министерството минатата недела најави и нов капитален проект – „Врвови на светската филозофија, историја и психологија со психонализа“, наменет за академската јавност, студенти, но и за широк круг читатели.
Ќе содржи 342 книги (102 од филозофија, 127 од историја и 109 од психологија и психонализа), а ќе се збогати со уште 44 наслови по препорака на експерти од овие науки од познати универзитетски центри.