Во клубот „Менада” в четврток во 20 часот ќе се одржи промоцијата на книгата „Исповедни финеси” на Влатко Галевски, филмски критичар, a промотор на делото ќе биде професорот Ферид Мухиќ.
Се работи за 107. издание во едицијата ПРОаЗА на издавачката куќа ИЛИ-ИЛИ, кое излезе од печат минатиот месец, за време на Саемот на книга во Скопје. Книгата содржи вкупно 30 финеси, фотографијата на корицата е на Мартин Галевски, дизајнот го изработи бригада.мк, а излегувањето на книгата финансиски е поддржано од Министерството за култура на РМ.
Во поговорот за книгата насловен Шармот на автентичноста, Мухиќ напиша: “Со „Исповедни финеси“ Влатко Галевски формулира едно апсолутно исклучително и исто толку потребно стојалиште на обновен респект за автентичноста на нашиот сопствен живот. Длабоко сум убеден дека книгава што ја држите во рацете спаѓа во онаа хуманистички инспирирана и естетски афирмирана литература од рангот на Саројан, Селинџер, Ефраим Кишон, а којашто одигра витална улога во самопочитување на цели генерации.”