Промоцијата на романот „Фото синтеза“ на Игор Анѓелков ќе се одржи денеска напладне во книжарницата „Или-или“
Се работи за третата книга на Анѓелков, по дебитантската збирка раскази „Кротки приказни“ (2006 г.) и романот „Крај-пат“ (2010 г.), кои наидоа на одличен прием кај читателите.
– Ако го сакавте она меко, кротко, непретенциозно раскажување со речиси филмска монтажа, ако ја сакавте онаа благост со која авторот сигурно ве „управува“, ревносно хранејќи ви ја илузијата дека „воланот“ е во ваши раце, ако ви се допаѓаше книжевната тура низ секојдневието со задолжителната посета на несекојдневното, ако ги помните „Кротки приказни“ и „Крај-пат“ – тогаш „Фото синтеза“ е одлично „место“ за утврдување на совладаната книжевна материја – пишува писателката Оливера Ќорвезировска во рецензијата за романот.