Документарно-играниот филм „Пресвета Богородица,Спаси не“ на актерката и режисер Весна Димитровска освои уште една награда на меѓународниот католички фестивал на христијански филмови во Белорусија.
Филмот „Пресвета Богородице, Спаси не“ во Белорусија, во конкуренција на четириесет филмови од седумнаесет земји од светот, ја освои највисоката награда на фестивалот, првата награда од стручната жири комисија на меѓународниот католички фестивал на христијански филмови. Инаку, ова е трета награда по ред на овој филм.
Весна Димитровска Бобевски на денешната прес-конференција појасни дека на фестивалот на кој учествувала се чувствува сплотувањето на религијата и уметноста. Фестивалот кој опстојува десет години за неа е уште поважен бидејќи преку неа првпат Република Македонија имала свој претставник на фестивалот, а во таа чест таа симболично засадила костеново дрво.
– Чувството е навистина убаво, возбудата е огромна, филмовите беа сите со црковна тематика. Имаше многу филмови и чест ми е што и македонски филм имаше можност да се претстави и да добие неочекувано награда, потенцира Димитровска Бобевски.