Во бар-клубот „Хемингвеј“, во албанската метропола, вечер со почеток во 20 часот, ќе се одржи поетска вечер, со поетесата од Македонија, Елена Пренџова насловена „Пренџова и пријателите“.
– Вечерта е осмислена како средба на која секој гостин може да ја презентира својата поезија и да се приклучи на читањето. Нашата позната поетеса Пренџова е на едномесечен поетски престој во Тирана, во организација на „Поетека“, а поддржано од „Традуки“ и Министерството за култура на Република Албанија. Таа деновиве имаше средба и со Mакедонците кои живеат во Тирана, изјави Никола Ѓурѓај, претседател на македонското друштво „Илинден“.
Елена Пренџова (30) е автор на стихозбирките „Живот под ѕвездите“, „Пораки од морето“, „Таа“ и „Јас“, како и на „Антологијата на младата македонска авангардна поезија“. Нејзини песни се застапени во панорамски и антологиски избори на современата македонска поезија, објавени во Македонија и во странство.
Таа е добитник на наградата „Најдобар поет“ на првите регионални средби во Брчко, Босна и Херцеговина, во 2012 година.
Поетесата Пренџова, како што беше соопштено деновиве, е добитничка на наградата „Даница Ручигај“ што ја доделува Друштвото на писателите на Македонија за најдобра стихозбирка од авторка, членка на македонската писателска асоцијација. Наградата и е доделена за стихозбирката „Политички коректна“, објавена во издание на „Матица македонска“.