Во понеделник (17.03.2025) со почеток од 12 часот, во Домот на култура „Билјана Беличанец“ во Кисела Вода, премиерно ќе биде изведена театарската претстава „Плашливиот Лав“.
„Плашливиот Лав“ е детска театарска претстава која носи силна порака за другарство и социјализација кај децата. Основното дејствие се случува во големиот магичен град – Вондер Сити. Лавот Роби има сон да стане крал на поп музиката. Но за жал, неговите стравови го спречуваат да си го оствари својот сон. И покрај неговиот прекрасен глас, Роби е премногу срамежлив да пее за кој било друг освен за себе. Поради своите стравови, лавот Роби се заплеткува во низа урнебесни и комични ситуации, кои прават да е многу тажен. Се додека еден ден, случајно не го запознае кловнот Боби, кој блеска со самодоверба и позитивна енергија. Боби го открива талентот на Роби и го гледа потенцијалот во неговиот глас. Решен да му помогне на Роби да го надмине стравот од сцената, Боби станува негов ментор и пријател.
Автор на претставата е Марјан Анѓеловски, а улогите ги толкуваат актерите Јасмин Рамани и Мето Јанакиевски.
Проектот е поддржан од Министерството за култура и туризам на Р.С. Македонија.
Одлична можност за најмладата публика да биде дел од едно уникатно театарско музичко-сценско искуство!