Контрапункт – асоцијација за развој на критичка теорија, социо-културен активизам и современи културни практики, во рамки на проектот „Проширено естетско образование“ го започнува првиот модул на програмата дизајнирана и наречена: „Лаборатории на параестетичкото – ревоспоставување на политичкото“ (www.kontrapunkt-mk.org).
Со оваа своја програма, Контрапункт ја продолжува својата капитална истражувачка и практика на релациите помеѓу уметноста, политичкото и политиката, која започна уште во 2001 година и ја развива до денес преку многубројните проекти (Ширење и Слевање на Маргините, Школата за критичко мислење, Редефинирање на јавните културни простори, Расшколувано знаење…)
Првиот модул од овој обемен проект Проширено естетско образование е наречен „Архиви на насилството“ и ќе биде предводен од културниот теоретичар и политички филозоф Гералд Рауниг, кој ќе одржи јавно предавање насловено како „Машинистички капитализам, поделеност и насилство“ на 6 ноември, со почеток во 19.30 часот во ГЕМ клубот.
Низ овој резиденцијален модул (во чии рамки ќе се одвиваат повеќе предавања и семинари во периодот на 2015/2016 година) ќе се истражува и презентира процесот на архивирање на насилството во 20 и 21 век. Едно од основните прашања ќе биде како преку испитување на практиките на моќта и на насилството да ги разликуваме препознаваме и архивираме карактеристиките на политичките манифестации на заедницата и на субјектот, она што ја овозможува неговата егзистензија во услови на интелектуална, творечка и политичка репресија. Кои се перформативите на насилие во мултикултурни политички некултивирани средини. Како моќта и потчинувањето стануваат дискурзивен услов во артикулацијата на секое „ние“.
„Лаборатории на параестетичкото – ревоспоставување на политичкото“ има за цел да понуди модел на лабораторија кој ќе ги истражува парадигмите на моќта, еманципаторските разгранувања на политичкото и на естетското во патеката која комуницира со сите репресивни облици врз граѓанството: обрaзовниот, социјалниот, културниот, политичкиот и медиумскиот.
Во социо-културниот контекст каде што се случува целосна девастација на политичката култура и недостиг на дијалог внатре културните формации и различните културни идентитети и практики, нужно e формирањето на јадро кое критички ќе ги преиспитува можностите и границите за формирање на оние формати на комуникациски алатки и вредности кои ќе бидат база за понатамошни дискурзивни, но и оперативни, активистички, социо-културни и политички артикулации на и во јавната сфера.
Во недостиг на знаења кои ќе упатат на тоа дека уметничката продукција, културниот капитал и политичките перформативи во рамки на самоорганизираните граѓански заедници и рефлекси во агората, мора да се афирмира потребата од хибридност во акциите, особено во општество каде што имаме повеќеслојни етнички и културни идентитети, каде што медиумите и просторот за граѓанско дејствување е деградиран и киднапиран од политичките елити. Неопходно е да формираме континуиран модул каде што ќе се истражуваат и изучуваат можностите на интерферирање помеѓу естетското и политичкото, помеѓу уметничките практики и нивното влијание врз пошироката демократизација на општеството, помеѓу граѓанските заедници и медиумските облици на борба..
Со параестетичката појдовна точка политичкото се деелитизира и деконструира преку уметничката продукција. Овој концепт ги поставува следните прашања: Како одредени социјални и политички категории да се мислат во термините на културата и уметничката продукција, и како културната продукција да се мисли во термините на политичкото. Параестетиката ги исцртува филозофските, политичките и историските врамувања со кои социо-културните практики се поврзани. Крајниот резултат на ваквиот лабораториски концепт е формирање платформа за употреба на уметничките практики во критичко преиспитување на идеолошките, социјалните, политичките дискурси.
Гералд Рауниг е филозоф, теоретичар на култрата кој ги истаржува врските помеѓу политиката – уметноста – културата; Работи во Zürcher Hochschule der Künste и во eipcp (Европски институт за прогресивни културни политики); член на уредувачкиот одбор на повеќејазични издавачки платформи како „transversal texts“ и списанието „Kamion“. Неговите книги се преведени на англиски, српски, шпански, словенечки, руски, италијански и турски.