Издавачката куќа „Макавеј“ во заедничко издание ги објави поетските книги „Приспособување кон времето“ и „Љубов со водената вила“ од украинските автори Тетјана Ѕјуба и Сергиј Ѕјуба. Двата наслова објавени во една книга се во препев на македонски јазик од писателката и преведувачка Вера Чорниј Мешкова.
– Поетското претставување на тандемот Ѕјуба на македонски јазик претставува избор од нивното најмаркантно поетско творештво кое се создава во изминатите децении и е преведено и препознатливо во европски и во светски размери. Сергиј и Тетјана Ѕјуба во моментов се меѓу најрепрезентативните претставници на современата поезија во својата земја, соопшти „Макавеј“.
Нивни книги се преведени во педесетина држави, а се носители и на најзначајните украински книжевни награди, како и на признанија во повеќе ервопски земји, во САД, Австралија и во земји од Азија.
Книгата е во продажба во книжарниците „Или-Или“, „Култура“ и „Антолог“ и на порталот kupikniga.mk.