Во рамки на одбележувањето 25 години постоење, издавачката куќа „Матица македонска“ ја објави поетската книга „Сарај од наслади“ од битолскиот автор Кире Неделковски.
Книгата е финансирана од Министерството за култура, содржи 72 песни во осум циклуси и, како што истакна поетот, оваа поезија ја брани убавината и ја слави светлината на духот на ова време.
– Сарајот претставува духовен дневник во кој се опеани многу настани и ликови кои беа примарни за мојата инспирација. Особено внимание посветив на корпусот песни за Струга во циклусот „Струшки страсти и наслади“. Водата како симбол и вдахновение е присутна во многу песни, а се издвојуваат „Поети покрај реката“, „Реката Дрим“, „Струшки залив“ и други песни. Слободно можам да нагласам дека оваа поезија ќе остави длабоки траги во нашата објавена продукција за оваа година, но ќе се памети и понатаму поради својот суптилен поетски глас, посочи Неделковски.
Кире Неделковски има објавено 15 стихозбирки и четири избори со своја поезија. Застапуван е во повеќе избори и антологии. Често објавува во нашата периодика, но и во странство.