Во Приштина денеска ќе биде снимена првата клапа на играниот филм „Татко“, режисерско деби на Висар Морина, кој е и автор на сценариото.
Филмот е германско-косовско-македонска копродукција. Одговорни за реализација на филмот се „Нико филм“ од Германија, „Круша продуксиони“ од Косово и „Скопје Филм Студио“ од Македонија за што е добиена финансиска поддршка од националните филмски фондови.
Една од улогите во филмот ќе ја толкува македонскиот актер Џевдет Јашари, а во екипата ќе бидат вклучени и авторот на шминка Мартин Павловски и дизајнерот на звук Игор Поповски.
Филмот ќе се снима на повеќе локации во Косово, Македонија и Германија. Во Македонија снимањето ќе се одвива во Охрид во првата половина на јули.
Филмот преку ликот на десетгодишното момче Нори, кое е приморано прерано да созрее, дава еден поинаков приказ на Косово во деведесеттите години од минатиот век. По прераната смрт на неговата мајка, Нори не може да прифати да биде напуштен и од својот татко Гзим.
Нориевата детска истрајност покажува екстремна длабочина, што ја издигнува над приказната на еден бегалец или политичкиот контекст на Косово.
Режисерот Морина по потекло е од Косово, а веќе подолго време живее и работи во Германија.