На 67-годишна возраст денеска почина Благојa Стефановски – Баге, поранешниот министер за култура, пратеник од Битола во Собранието на Македонија, директор на битолскиот театар и актер во пензија, претседател на ракометниот клуб Пелистер, претседател на фестивалот, „Браќа Манаки“, основач на малиот театар во Битола.
Стефановски, дипломиран актер, роден во Битола на 7 март 1953 година, од 1975 до 1980 година бил директор на Битолскиот народен театар, бил претседател и селектор на драмската програма на Фестивалот „Охридско лето” и претседател на Фестивалот „Војдан Чернодрински”.
Еден мандат од 1994 до 1998 година бил пратеник во Собранието на Република Македонија, а од 1 ноември 2002 година до 6 јули 2006 министер за култура.
Љубителите на ракометот во Битола ќе го паметат покрај театарот и како претседател на ракометниот клуб Пелистер, во чиј мандат Пелистер забележува големи успеси на меѓународна сцена.
Стефановски е добитник на голем број на театарски награди, општествени и спортски признанија, а во 2019 година ја доби наградата „4 Ноември” за животно дело.