На Фестивалот на музичките уметници на Македонија „Златна лира 2017“ вечер во Музеј на Град Скопје ќе настапи пијанистката Мимоза Ќека. Ќе изведе дела од Моцарт, Равел, Дебиси и Лист.
Мимоза Ќека во 2015 година дипломирала на Факултетот за музичка уметност во Скопје, во класата на проф. Тодор Светиев и е член на Сојузот на музички уметници на Македонија-СМУМ.
Оваа година магистрираше на одделот по музичка интерпретација – пијано под менторство на маестра Лилија Зилберштајн. Од 2015 година работи како професор по пијано во ДМБУЦ „Илија Николовски Луј’’.
Настапувала на домашни и меѓународни фестивали и натпревари и учествувала на семинари кај познати пијанисти, како Алексеј Володин и Александар Гиндин, а посебно се издвојува нејзиното усовршување на реномираната Academia Musicale Chigiana во Сиена, Италија.