Орхан Памук од Турција и Виктор Ерофеев од Русија се добитници на меѓународната книжевна награда „Табернакул“ за 2013 година, која лани ја востанови издавачот „Табернакул“.
Одлуката ја донесе одборот за доделување на наградата, во состав Ферид Мухиќ, Горан Стефановски, Венко Андоновски, Цветан Враживирски и лауреатите на првата награда „Табернакул“ минатата година – Милан Кундера и Љубивоје Ршумовиќ.
Наградата ја симболизира скулптура, дело на вајарот Горан Стаменков, а се состои од паричен износ од 5.000 евра, златник со името на добитникот и објавување досега необјавено дело на македонски јазик од наградениот автор. Во моментов се работи на превод и подготовка за печат на книгите „Немиот дом“ и „Наивниот и сентименталниот романописец“ од Орхан Памук и „Руска убавица“ и „Акимудија“ од Виктор Ерофеев, кој не е многу преведуван на македонски јазик.
– Орхан Памук и Виктор Ерофеев се новите реперни точки на културната мапа која секојдневно ја доцртуваме, реперни точки кои во исто време се темели на невидливи палати низ кои само може да се мине а не може да се срушат, ленгери на бродови кои се укотвиле да истражуваат по темното и неодгатливо дно на душата. Доделувањето на оваа награда сакаме да биде и еруптивна побуна против општиот пад на моралот и темелните вредности, димензија денес неопходна во овој компјутеризиран вител што голта, рече на прес-конференција Цветан Враживирски од „Табернакул“.
Министерката за култура Елизабета Канческа Милевска им ја честиташе наградата на Ерофеев и на нобеловецот Памук, за кој рече дека е меѓу нејзините омилени автори и очекува нивните дела во иднина да бидат што подостапни на македонски јазик, а оваа награда да стане неодминлива и традиција во македонската култура.
– Од огромна важност е востановувањето на оваа награда за автори кои дале исклучителен придонес за развојот и афирмацијата на светската литература, истакна Канческа Милевска, нагласувајќи дека идејата на „Табернакул“ се совпаѓа со општите заложби на Владата и на Министерството за култура кои во изминатите неколку години вложуваат во капитални книжевни проекти. Посочи и дека оваа награда е поддржана од Министерството за култура како проект од национален интерес зашто значи и промоција на македонскиот јазик и литература.
За творештвото на Памук (1952) и на Ерофеев (1947) зборуваа писателите Ферид Мухиќ и Венко Андоновски. Наградата на лауреатите се планира да им биде врачена на 25 декември под покровителство на премиерот Никола Груевски.