Друштвото за издавачка дејност „Македоника литера“ од Скопје објави две книги за деца и млади од Шен Шиси, еден од најпознатите современи писатели за деца во Кина „Мајката Чакал Скарфејс – роман и Лисицата Трговерец – раскази.
Како што информираат денеска од „Македоника литера“, неколку дела на Шен Шиси се сметаат за ремек-дела во современата кинеска литература за деца и млади, меѓу кои и овие две. Романот „Мајката чакал Скарфејс“ од англиски јазик го преведе Славчо Пеев, а збирката раскази „Лисицата трговец“ Влатко Стојковски, исто така од англиски јазик.
Шен Шиси е најпродаваниот автор за деца во Кина. Тој е повеќекратен добитник на највисоките награди за литература за деца во Кина. За романот „Мајката чакал Скарфејс“ ја доби тринаесетта по ред награда `Кинеска книга`. Негови дела се преведени на повеќе јазици. Живее во Шангај, Кина.
-„Мајката чакал Скарфејс“ е роман за суштинската поврзаност меѓу најнеoчекуваните сојузници – чакалите и луѓето, како и за врските кои се испреплетуваaт меѓу нив. Скарфејс и нејзината глутница златогрби чакали живеат тежок живот. Збирката „Лисицата трговец“ е составена од седум раскази во коишто се прикажани диви, но и домашни животни. Самиот наратив е напишан во лесно читлива форма и содржи многу информации за однесувањето на животните и нивната емоционална интелигенција; во него се прави паралела меѓу однесувањето на луѓето и животните и се отвораат морални и еколошки прашања, прашања за потребната одговорност и меѓусебното помагање, соопштува „Македоника литера“.
Овие две книги се први дела на Шен Шиси преведени на македонски јазик. Во текот на оваа година, од истиот автор, „Македоника литера“ ќе објави уште пет тома избрани раскази со тема животни.