Книга со досега непубликувани трудови на авторот на првата граматика на македонскиот јазик Круме Кепески, насловена „Статии и анализи за македонскиот јазик“ неодамна објави Друштвото за издавачка дејност „Македоника“ од Скопје.
Книгата содржи статии, говори, предавања и разработени јазични прашања, што се однесуваат на општите согледувања на развојот на македонскиот јазик и за одделни јазични прашања; на методиката на наставата за македонскиот јазик; и на лексиката на македонскиот јазик.
Овие трудови на Кепески се исклучително значајни од лингвистички и културолошки аспект поради фактот што тој е авторот на првата македонска граматика, основоположник на граматичарската дејност во Република Македонија и најплодниот автор со дури педесетината изданија на граматики на македонскиот јазик наменети за образованието. Трудовите на Круме Кепески го одбележуваат и развојниот пат на македонскиот литературен јазик.
Круме Кепески (Прилеп, 1909 – Скопје, 1988), македонист, педагог, учебникар, методичар, преведувач, собирач на народни умотворби, првата Македонска граматика ја објавил на 26.1.1946 година. Автор е на повеќе граматики за основното и средното образование. Постхумно се објавени книгите: Прилепскиот говор (1993), Островот бил парче земја (1994), Книга за Круме Кепески (1999) и Од нашиот речник (2007).