Друштвото за издавачка дејност „Македоника“ од Скопје ја објави теориско-есеистичката книга „Мисла и смисла“ на Нове Цветаноски. Книгата содржи над педесет теориски, критички и есеистички текстови и претставува избор од околу тридецениската литературно критичарска актива на авторот.
„Мисла и смисла“ е составена од два дела. Првиот дел – „Читање и толкување“ содржи еден обемен теориски текст – „Толкувањето на поезијата“, кој всушност е студија за толкувањето на литературното дело, првенствено на песната.
Во вториот дел, „Избор и збор“ се опфатени критичко-есеистички согледби на дела од современата македонска литература, односно за поезијата, прозата, литературата за деца и млади и за книжевната историја.
– Видена како целина, книгата „Мисла и смисла“ на Нове Цветаноски претставува камерен, што значи хармоничен и целисходно подготвен избор од неговата веќе неколку децениска литературно теориска и литературно критичка актива. Не случајно, затоа, книгата е и структурирана со оглед на тие два сегмента од неговиот, инаку, уште поширок досегашен ангажман како на планот на литературата, така и пошироко, пишува рецензентот на книгата, Науме Радически.
Нове Цветаноски е публицист, преведувач, литературен критичар, есеист и издавач. Превел и препеал десетина книги и повеќе литературни текстови од бугарски, хрватски, српски и други јазици. Автор е и на книгата „Разнесено наследство“, на публицистички и монографски дела, а е приредувач на зборникот со интерпретативни текстови „Толкувања“.