Во издание на „ПНВ Публикации“ од Скопје објавена е книгата „Острење од тапоста“ од Иван Антоновски.
Се работи за збирка колумни, објавени во периодот од декември 2013 до март 2014 година.
Колумните на Антоновски, според издавачот, содржат анализирање и промислување на современата македонска книжевна сцена и македонскиот културен простор. Антоновски, како што посочува издавачот, ги отвора прашањата што досега никој не се осмели да ги отвори: прашањата за релативноста на наградувањето и наградите, непостоењето на сериозна книжевна критика, функционирањето на книжевниот пазар во земјава и ранливите прашања на вредностите и комерцијализацијата. Авторот говори за непостоењето критериуми во креирањето одредени антологии и за борбата на генерациите и поетиките во македонскиот книжевен салон.
Книгата „Острење од тапоста“ е единствена во својот вид кај нас и претставува значаен чекор во обидите за воспоставување критериуми и за превреднување на културните чинители што во нашиот културен простор, неретко некритички се восприемаат.
Ќе биде достапна на Саемот на книгата на штандот на „ПНВ Публикации“.